Hajiu lijutu nabeddra nutizza!
I chissi tiampi u d'è na cosa i nenti...
Subbu u blog i du vicisindico cc'è ru bandu ppi l'appartu i Ponti Ciccioni...
Cc'è scrittu puru:
"Con questo adempimento praticamente l'Amministrazione Comunale di San Mauro Marchesato completa il programma elettorale con il quale si era prersentato agli elettori e sul quale aveva chiesto il voto."
Mo ija dicu:
Ma si Santamarisi su propria cicati?
Ma cuami, l'amministrazioni ha fattu tuttu chiru c'avia prumintutu ed iddri u ssi ndanu mancu addunatu?
U suannu i du Sindicu s'ha fattu riartà e ri Santamarisi u riescianu a ru vidiri?
A ssu puntu dua su i cosi:
O puru u Vicisindicu si sonna, o i santamarisi stanu tutti durmiandu e chiri i l'amministrazioni sù l'unici vigghjianti.
Vua vidiri ca u fattu ca Santu Mauru stà muriandu è sulu nu suannu e intra a riartà Santu Mauru è divintatu nu paradisu?
Ma pò d'essiri puru ca l'amministratori nuastri si pensanu ca siccomi u ppulu u parra vo diri ca è cuntiantu o ca dorma e allura nu "cumunicatu" i cchjiù o unu i menu u ffà diffirenza.
S'è chissa è ra pinzata, allura è migghjiu ca su ricordanu:
U populu nè dorma e nnè è cuntiantu, fa sulu u cazuni ppi nu jiri a ra guerra.
Mò vua puterravu diri:
Ma u d'aviji dittu ca era na bbona nutizza?
E avissavu puru raggiuni!
U fattu però è ca chini s'ha squadatu ccu l'acqua cavuda, pua si spagna puru i l'acqua fridda!
Mi spiagu:
A nutizza e subba l'appartu, ma u proggettu i Ponti Ciccioni l'anu vistu sulu u Sindicu e ru Vicisindicu, e ri Santamarisi ud'è ca u sanu chhi intendanu loru ppi "riqualificazione urbana del " Ponte Ciccione ".
Pò d'eesiri na jazza o nu gaddrinaru!
Prima i gridari a ru miraculu, cumi Santu Tumasi, vulerramu tuccari. Ud'è ppi d'ancuna cosa, ma i fili i da luci subba a gghjiasa ancora pendanu, l'"arvuli " su già siccati e ri marciapiadi sù già lesionati.
L'urtima vota c'amu sintutu parrari i Ponti Ciccioni, si parrava di nu Miliardu e duaciantu miliuni!
Mo amu scopertu ca si po fari puru ccu ciantuquarantamila aerii e namu domandatu:
U ss'avianu saputu fari i cunti prima, o ni stanu mpirruzzandu nu gaddrinaru mò?
U populu vigghjiantu u vulissa sapiri!
PRIMA!!!!